Los Perros en Castro Urdiales (Cantabria)

‘Los perros’ propón alcanzar un estado de resistencia; coma cans que deambulan, cans que se atopan, que se recoñecen vulnerables, que comparten alegría, pero tamén dor, que caen e se erguen, que bailan, que se rebelan a través do amor, a xenerosidade e o compromiso, para atopar nese traxecto común o sentido das súas propias vidas, para superar xuntos a violencia e o deterioro.

Unha obra que viaxa desde o transo da repetición á fascina- ción pola sucesión de imaxes. Imaxes roubadas do pasado e lanzadas ao futuro, do agora e enzoufadas do pasado, da plástica contemporánea á forma atávica, terreal, nun cruzamento constante de tempos e de linguaxes.

A exhibición dunha danza pasional que atopa o sentido máis puro na repetición e na catarse: bailar ata a extenuación, ladrar ata o abatemento, vivir ata o desfalecemento. Dous homes abrazados. Dous homes que bailan ata que todo remate e todo volva comezar.

Led Silhouette 

Led Silhouette é unha compañía de danza creada e dirixida por Martxel Rodríguez e Jon López, con sede na vila de Lesaka, Navarra. Paralelamente á actividade como intérpretes na compañía La Veronal, inician en 2016 a súa etapa como creadores codirixindo o colectivo de artistas novos formados en diferentes disciplinas da danza e influenciados pola arte contemporánea.

Investigan sobre novas formas de movemento co obxectivo de ofrecer a súa propia visión da danza contemporánea, construíndo unha plataforma onde traballar e facer de Led Silhouette algo propio.