Gorpuztu en Santiago de Compostela (A Coruña)

‘Gorpuztu’ é un espectáculo de danza contemporánea con música en directo que fala sobre a procura do equilibrio.
É unha loita por estar en calma, por silenciar o ruído, por alixeirar a carga e a culpa, por atopar un lugar onde o animal
durma tranquilo. Nace dunha investigación sobre o uso do corpo en determinados momentos en determinadas relixións.

Dividindo o corpo en varias partes, observando accións de movemento á hora do rezo e pasando por conceptos como culpa, penitencia, transcendencia, amor, submisión… presentes en diferentes relixións, nace ‘Gorpuztu’.

Cía Eva Guerrero

A Cía. Eva Guerrero creou espectáculos de danza de rúa e sala, como ‘El fin de las cosas’ (Premio Karrikan), ‘Gorpuztu’ e ‘LOF Ladies on Fight’, que mesturan poéticas actuais, música en directo e corpos expresivos. Ademais, desde a compañía propoñen outros proxectos para achegar a danza a públicos novos (como libros, videodanzas, proxectos inmersivos para gafas de realidade virtual, etc.).
Os seus traballos víronse en Umore Azoka, DFeria ou o TAC de Valladolid, dentro do estado, e en Córcega, Biarritz ou Burdeos os últimos anos. ‘Gorpuztu’ foi dúas veces candidato aos Premios Max.