”El dilema del corcho”, Tartean Teatro (Euskadi)

O profesor xubilado, esquerdista, polémico, axitador e moi prestixioso, ten un cancro terminal, pero xurdiu a posibilidade de curación: pode recibir tratamento cun dos equipamentos de radioterapia que un coñecido multimillonario doou ao sistema público de saúde. Agora el debe decidir se ser fiel aos seus principios e inmolarse, ou baixar os pantalóns e bicarlle o cu ao filántropo.
Hoxe tomou unha decisión. Cando está preparando a súa alocución, un descoñecido, un antigo alumno co que ten contas pendentes, irrompe no seu despacho.

Tartean Teatro aposta pola creación orixinal. É dicir, na compañía creamos, producimos e distribuímos espectáculos propios.
Todas as nosas obras son orixinais e creámolas en grupo, desde o xerme inicial ata o final sobre o escenario. É un teatro contemporáneo que fala das preocupacións do noso tempo, baseado no teatro aristotélico (a palabra e a trama), empregando as novas formas e utilidades que ofrece o teatro postdramático, en cada momento e segundo o requira a proposta.
Este tipo de teatro emprega rexistros de comedia e traxedia, e moitas veces combinamos ambos nunha mesma peza: drama con burbullas de comedia ou comedia con toques de drama.