El último aullido
Cantabria | Trueba & Trueba Producciones
Debe un home esquecer o aprendido para atopar o seu eu máis auténtico? Pódese loitar contra un mesmo?
Un home só en escena recolle datos do público e incorpora esas biografías á del para reconstruír un pasado que pode ser o de moitos. A través de recordos que se mesturan con ficción, o actor desmonta os mitos do “macho alfa” fronte ás realidades do amor, o desexo, a paternidade ou a perda do pai.
Algúns momentos atravesan o espectador; outros provocan riso por verse reflectido. A obra interpela sobre o que significa ser un home hoxe e lévanos a un territorio de amizade, lealdade e vulnerabilidade compartida. En definitiva, trátase dunha posta en valor das cualidades que nos fan ser máis homes e menos lobos.
Trueba & Trueba Producciones arranca a súa andaina escénica en 2022 co foco posto no desenvolvemento de proxectos con impacto social.
As pezas da compañía caracterízanse pola participación activa do espectador, a ruptura da cuarta parede e unha exploración constante de temas contemporáneos desde unha mirada próxima e comprometida.
O seu traballo sitúase na intersección entre creación artística, participación cidadá e reflexión social, co obxectivo de xerar experiencias escénicas vivas, accesibles e conectadas co presente.
