Destacado
El último aullido
Cantabria | Trueba & Trueba Producciones
¿Tien un home de desaprender lo aprendío p’atopar el so yo más auténticu? ¿Puede lluchase escontra ún mesmu?
Un home solu n’escena recueye datos del públicu ya incorpora eses biografíes a la suya pa reconstruyir un pasáu que puede ser el de munchos. Al traviés d’alcordances que s’entemecen con ficción, l’actor desmonta los mitos del “machu alfa” frente a les realidaes del amor, el deséu, la paternidá o la perda del padre.
Dellos momentos traviesen al espectador; otros provoquen risa al vese reflexáu. La obra apella sobro qué significa ser un home güei y llévanos a un territoriu d’amistá, llealtá y vulnerabilidá compartida. A la fin, trátase d’una puesta en valor de les cualidaes que nos faen ser más homes y menos llobos.
Trueba & Trueba Producciones arrinca la so andadura escénica en 2022 col focu puestu nel desenvolvimientu de proyectos con impactu social.
Les pieces de la compañía caracterícense pola participación activa del espectador, la rotura de la cuarta paré y una esploración constante de temes contemporáneos dende una mirada cercana y comprometida.
El so trabayu asitiase na intersección ente creación artística, participación ciudadana y reflexón social, coles mires de xenerar esperiencies escéniques vives, accesibles y conectaes col presente.