La programación espandida, qu'arrodia'l nuesu camín superando les sos posibilidaes a nivel d'intercambiu, participación del públicu o reflexón. El nuesu Camín Espandíu cunta con 4 tipos de propuestes:
Alcuentros online Camín(a)casa
Nesta 2ª edición, Camín Escena Norte refuerza la estaya de pensamientu, alcuentru y reflexón, con una batería de 9 alcuentros de calter online. En 4 d'ellos, y como refuerzu de les actividaes de mediación alredor de los espectáculos, vamos conocer a les 8 compañíes que formen parte del Itinerariu Constelaciones, les sos trayectories artístiques, los espectáculos que formen parte de la nuesa programación y la contestualización de los mesmos na programación xeneral del proyectu.
Amás, proponemos otres cites online con profesionales y axentes de referencia del sector siempres cola clave de tender pontes y abrir caminos de rellación y conocencia profesional ente Galicia, Asturies, Cantabria y Euskadi, sobre temátiques como los retos de la programación escénica na era COVID-19, retos de la producción y exhibición d'espectáculos, el trabayu del texíu asociativo o la importancia de la mediación na (re)conexón colos públicos.
Actividaes de mediación al rodiu de los espectáculos
Conexón Escena Norte
El programa de mediación col públicu va constar de 2 tipos d'actividaes, una previa a la función y otra posterior. Estes van ser:
Talleres previos de contestualización y trabayu colos públicos al rodiu de les temátiques de los espectáculos
Al traviés de estremaos talleres de mediación previos y venceyaos a los conteníos y temátiques de les funciones del Itinerariu Constelaciones, vamos tratar la diversidá de llinguaxes y estétiques que conformen la batería d'espectáculos escoyíos. Van ser actividaes previes, pa públicu infantil/familiar o adultu dependiendo del espectáculu, que de forma llúdica averen idees, conceutos, temátiques clave pal entendimientu de les pieces escéniques que'l públicu va ver dempués, mediación que se va ver tamién reforzada/completada colos alderiques posteriores.
Van facese nun espaciu estremáu del espaciu escénicu, animando al públicu a asistir na idea de la esperiencia total: non solo ver un espectáculu, sinón tamién tener accesu a una(es) actividá(es) al rodiu del mesmu que facilite(n) la so comprensión. Estos talleres recueyen el conceutu d'escuela d'espectadores/as pa facer un trabayu previu de mediación col públicu teniendo bien en cuenta la riqueza temática, narrativa y espresiva que reflexen los espectáculos del Itinerariu.
Alderiques y alcuentros posteriores a les funciones, cola compañía y mediaos/acompañaos por profesionales d'otres compañíes del territoriu
Les posfunciones van tar protagonizaes por xuntes d'alderique ya intercambiu al terminar la función, organizaes pa tener llugar dende'l mesmu espaciu escénicu. Completando la mediación de los talleres previos, estos alcuentros van sirvir pa conocer más en detalle'l trabayu del montaxe que'l públicu acaba ver, falar col repartu y, en delles ocasiones, col director/a y completar la esperiencia inmersiva con una velada completa, más allá de ser simple espectador pasivu d'una pieza escénica.
Los alcuentros van cuntar con personal de mediación que va trabayar enantes coles compañíes nel tratamientu y organización de los temes d'alderique. Tamién van sirvir pa interconectar compañíes de distintos territorios con llinguaxes y llínees artístiques asemeyaes, pos van ser estes compañíes “acoyedores” les que van mediar cola compañía “pelegrina” mientres l'alcuentru, animando l'alderique, empobinando les entrugues, etc.
Proxecto espositivu Ultreia. ¿Qué foi Camino Escena Norte 2019?
“Ultreia” (tamién “Ultreya” o “Ultrella”) ye una forma d'ánimu ente pelegrinos/es y que vien a significar “Vamos acullá” o “Sigui alantre”.
El 2019 foi l'añu del arranque del proyectu Camín Escena Norte. A lo llargo de les cuatro selmanes nes que se desendolcó la edición tuvimos la ocasión de recoyer una importante cantidá de documentación gráfica, na que se recueye a la perfección l'espíritu del proyectu. Al traviés de les imaxes captaes en 2019 podemos transitar pela implicación del públicu que nos acompañó, la calidá de les propuestes, los espacios patrimoniales qu'acoyeron los espectáculos, la collaboración de toos/es los/les profesionales que formaron parte... Ye por eso qu'en 2020 queremos amosar, mientres esta nueva etapa del Camín, el llegáu de los nuesos primeros pasos al traviés d'esta propuesta espositiva.
¿Ónde? Espaciu espositivu de la Biblioteca Pública Ánxel Casal (Compostela).
¿Cuándo? Del llunes 14 al miércoles 30 de setiembre, n'horariu d'apertura de la biblioteca.
Alcuentru profesional d'artes escéniques Habitación Pelegrina Pro
Habitación Pelegrina PRO recueye'l títulu del programa de residencies de creación basaes nel intercambiu ente comunidaes autónomes qu'implementamos na 1ª edición (2019)y qu’anguaño quier crear un espaciu de convivencia profesional onde'l centenar de compañíes qu’abarquen les asociaciones promotores (Escena Galega, EscenAsturias, ACEPAE y Eskena), más toes aquelles del sector que quieran xunise a l'actividá, puedan entrar en contactu, conocer les sos llínees de trabayu y propuestes estétiques, conocer la realidá de los distintos circuitos de programación, esplorar víes de coproducción y trabayu conxuntu y tener accesu a propuestes de formación que sían d'interés pal so desendolcu profesional.
Asina mesmu, l'alcuentru quier ser un focu de reflexón y conocencia sobro la realidad del sector nes circunstancies actuales, ensin perder de vista'l trabayu sobro'l modelu de residencies de creación que dende Camín Escena Norte quier siguir implementándose a partir de 2021.
¿Ónde? Centru Cultural Vellu Cárcere (Llugo).
¿Cuándo? Del martes 15 al xueves 17 de setiembre.
¿Pa quién? Compañíes d'artes escéniques y axentes profesionales del sector de les CCAA implicaes nel proyectu.
¿Cómo asistir? Información y programa completu equí.
