Ibilbide zabaldua

Ipar Eszena Bidearen programazio zabalduak emanaldien ibilbidetik kanpoko jarduera oro hartzen du barne, ardatz egituratzaile modura; inguratu eta osatu egiten du, ondorioak biderkatuz ikusleekiko harremanari, topaketari, bitartekaritzari, dinamizazio profesionalari eta sektorialari dagokienez. Ekintza lerro edo jardueren bi multzo handitan dago banatuta:

BIDEXKAK, jarduera profesionalak eta sektorialak

Hirugarren edizio honetan, Ipar Eszena Bidearen programazio zabalduaren barruan, BIDEXKAK ekimenak ikusle profesionalei eta dinamika sektorialei zuzendutako jarduerak hartuko ditu.  Bide eta aukera berriak irekitzea du helburu, bide nagusitik kanpo, zenbait konpainia hartuko dituen emanaldien programazioa bera. Sortu dugun lurralde kultural komun honetan elkartzeko espazioak, sinergiak, dinamizazio profesionala eta aukera berriak sortu nahi ditugu.

BIDEGURUTZEA, Truke Eszenikorako Egonaldiak

BIDEGURUTZEA truke eszeniko, artistiko eta profesionalerako egonaldien sarea da, Galizia, Asturiasko Printzerria, Kantabria eta Euskadi artean.

Egitasmo berri honetan proiektuan parte hartzen duten lau autonomia erkidegoetan espazio konplizeen sarea ezarri da; zazpi egoitzari esker, lau lurraldeetako sortzaile eta konpainien lana konektatzeko egonaldi profesionalak ahalbidetuko dira, hain zuzen ere, sorkuntzaren, ikerketa eszenikoaren, prestakuntzaren, koprodukzioaren eta, oro har, truke profesionalaren esparruetan, proiektutik abiatuz sortutako lurralde komun berri honen babespean.

PRO ERROMES GELA, Topaketa profesionala

Irailaren 14tik 16ra, Lugoko Vello Cárcere Kultura Etxean PRO ERROMES GELAREN bigarren edizioa ospatuko da, Ipar Eszena Bidearen arte eszenikoen topaketa profesionala, alegia.

Proiektuan parte hartzen duten lau autonomia erkidegoetan sektoreko eragileak konektatzea du helburu, eta topaketa profesionalaren formatua du, interes gune argiekin: konpainien eta sortzaileen arteko topaketa eta sinergiak, pandemiaren ondorengo sektore eszenikoak gainditu behar dituen erronketako batzuen inguruko hausnarketa eta prestakuntza eta konpainiek Ipar Eszena Bideko lurraldeetan dauzkaten promozio, ikusgarritasun eta banaketa aukerak.

Informazioa eta programa osoa hemen.

BABESLEKUAK, Ikusleekiko Harreman Jarduerak

BABESLEKUETAN ikusleei oro har eta/edo ikusleekiko harreman eta bitartekaritzara zuzendutako jarduerak biltzen dira. Elkartzeko, leku segurua izateko eta harremanak sortzeko ideiak babesleku kontzeptutik hartu ditugu, bideekin lotura estua dutelako, ulertuz BABESLEKU hauek partekatu, ikasi eta loturak egiteko espazioak eta lekuak izango direla, garai hauetan horren beharrezkoa den “segurtasunaren” ideia ahaztu gabe.

BITARTEKARITZA EKINTZAK IKUSKIZUNEN INGURUAN

Ikusleekin bitartekaritza lana egiteko programak bi motatako jarduerak izango ditu, bata emanaldiaren aurretik eta bestea emanaldiaren ondoren.
Hauek izango dira:

  • Ikuskizunen gaiei buruzko aldez aurreko tailerrak ikusleekin lan egin eta testuinguratzeko

    Konstelazioen Ibilbideko emanaldien gai eta edukiei lotutako aldez aurreko bitartekaritza tailerren bitartez, aukeratutako ikuskizunak osatzen dituzten lengoaia eta estetiken aniztasuna landuko dugu. Aldez aurreko jarduerak izango dira, haur eta familientzat zein ikusle helduentzat, ikuskizunaren arabera; publikoak gero ikusiko dituen pieza eszenikoak ulertzeko ideia, kontzeptu edo gai gakoak gerturatuko ditu; bitartekaritza lan hori ondorengo topaketetan osatu/indartuko da.   Dantza eta mugimendu arteen ikuskizunetan, horrelako ikuskizunak sortzeari lotutako mugimenduan landuko ditugu aurretiazko ekintza horiek.

    Espazio eszenikotik bereizitako beste espazio batean egingo dira; ikusleak animatu egingo dira, esperientzia osoaren ideian bertaratzeko: ez da soilik ikuskizuna ikustea, baizik eta ikuskizunaren inguruko (zenbait) jarduer(et)ara sarbidea izatea, errazago ulertzeko . Tailer horietan ikusleen eskolaren kontzeptua jasoko da, aldez aurretik bitartekaritza lana egiteko publikoarekin, kontuan hartuz ibilbideko ikuskizunek islatutako gaien, kontakizunen eta adierazpenen aberastasuna.

  • Ikuskizunen ondorengo eztabaidak eta topaketak konpainiarekin, lurraldeko beste konpainia batzuetako profesionalek lagunduta/gidatuta

    Emanaldien ondorengo saioetan truke eta eztabaida bilerak izango dira protagonista, ikuskizunen ostean, eta espazio eszenikotik bertatik egiteko antolatuko dira.

    Aurreko tailerren bitartekaritza osatuz, topaketa hauei esker ikusleek ikusi berri duten emanaldiaren muntaketa lanak gertuagotik ezagutu ahalko dituzte, aktoreekin eta, tarteka, zuzendariarekin hitz egin ahalko dute, murgiltze esperientzia bikaina osatuz; horrela, pieza eszeniko batean ikusle pasibo izate hutsetik harago doan esperientzia izango da.

    Topaketetan bitartekaritza langileak egongo dira; langile horiek aldez aurretik egingo dute konpainiekin lan eztabaidagaiak antolatu eta lantzeko. Horrez gain, lengoaia eta ildo artistiko antzekoa duten lurralde desberdinetako konpainiak interkonektatzeko ere balioko dute, topaketetan konpainia “hartzaileek” egingo baitute bitartekaritza lana konpainia “erromesarekin”, eztabaida dinamizatzen, galderak enfokatzen, etab.

ONLINE ETA OFFLINE PARTE HARTZEKO JARDUERAK

Proiektuan ikusleekin parte hartzeko hainbat ekintza proposatzen ditugu, sare sozialen bitartez, Ipar Eszena Bidean “komunitate” txiki bat sortzen hasteko.

TOPAKETAK KONPAINIEKIN ETA EZTABAIDAK

Horrez gain, beste online hitzordu batzuk proposatzen ditugu sektoreko erreferentziazko beste profesional eta eragile batzuekin, betiere zubiak eraiki eta harreman, hausnarketa eta ezagutza profesionalerako bideak irekitzeko asmoz Galizia, Asturias, Kantabria eta Euskadi artean, gai komun eta anitzak landuz. Orotara 8 online hitzordu izango dira.

TOPAKETAK ONLINE