REDE DE PROYECTOS D’INTERCAMBIU ESCÉNICU, ARTÍSTICU Y PROFESIONAL ENCRUCES

CRUZAMENTOS / ENCRUCES / CRUCES / BIDEGURUTZEA ye una iniciativa incluyida dientro la programación espandida Camín Espandíu, que cumple’l so cuartu añu y consiste n’una rede d’estancies d’intercambiu escénicu, artísticu y profesional ente Galicia, Principáu d’Asturies, Cantabria, Euskadi y la Comunidá Foral de Navarra. 

Delles claves del deseldolcu d’esta rede d’estancies son:

1. El presupuestu y acompañamientu económicu máximos per cada proyectu d’intercambiu va ser de 9.000 € (impuestos incluyíos). Encruces cunta nesti 2024 con un presupuestu total de 20.000 € (impuestos incluyíos).
2. La convocatoria Encruces ta empobinada a facilitar proyectos d’intercambiu ente compañíes productores qu’operen nel ámbitu profesional. Nun ta dirixida polo tanto a los y les creadores independientes, proyectos culturales (festivales, eventos, etc.) o otros colectivos que nun s’axusten a esta tipoloxía d’entidad.
3. La selección de los proyectos va llevase a cabu por aciu d’una comisión mista que va valorar caúna de les candidatures, na que va tar representáu l’equipu de coordinación de Camín Escena Norte, col so coordinador como comisionáu con voz y votu y la so coordinadora de producción, con voz pero ensin votu y que va actuar como secretaria de la comisión. Les otres 2 persones integrantes van ser profesionales espertes ya independientes de reconocíu prestixu nel ámbitu estatal en proyectos d’estes característiques, pero ensin rellación con Camín Escena Norte.
4. Coles mires d’esplicar los detalles de la convocatoria y resolver duldes y entrugues de les compañíes interesas va entamase una webinar informativa.

Les estancies d’intercambiu Encruces parten d’una compañía d’una de les Comunidaes de Camín Escena Norte proponiendo’l procesu d’intercambiu a otra u otres compañíes d’otra(es) de les Comunidaes.

Puede consultase más información equí: BASES 2024 Y LLISTÁU DE PROYECTOS ESCOYÍOS.

OFICINA CEN DE COOPERACIÓN ESCÉNICA

Esta nueva propuesta púnxose en marcha sofitada pol Ministeriu de Cultura al traviés de la so convocatoria d’ayudes pa l’acción y promoción cultural. Tratase d’un programa de consultoría y acompañamientu profesional que va reforzar l’actividá profesional de Camín Escena Norte, sofitando l’actividá de les compañíes nel ámbitu de la distribución, les sinerxies ente territorios y la conocencia sobro’l funcionamientu del sector escénicu profesional en caúna de les cinco comunidaes de Camín Escena Norte. Esta nueva oficina va funcionar de manera permanente como entidá independiente de sofitu a les compañíes y proyectos, dando continuidá demientres tol añu a los oxetivos del proyectu, más allá de les feches de la so programación oficial.

La Oficina CEN de cooperación escénica va cuntar nesta fase de proyectu pilotu con 3 partes fundamentales:

1. Un programa de cooperación interterritorial basáu na consultoría, asesoría y acompañamientu a productores profesionales d’artes escéniques de les 5 Comunidaes implicaes en Camín Escena Norte, nel marcu de la so actividá profesional fora de los sos propios territorios.
2. Un bancu de recursos sobro’l funcionamientu del sector escénicu profesional en caún de los territorios de Camín Escena Norte.
3. Una estratexa de sofitu estructurada a disposición de les compañíes que cada edición del proyectu xire dientro’l Ciclu Constelaciones.

HABITACIÓN PELEGRINA PRO. Alcuentru profesional en Llugo

Habitación Pelegrina PRO ye una propuesta que surde dientro’l proyectu Camín Escena Norte, concretamente tamién dientro la so programación espandida Camín Espandíu. Recueye’l títulu del programa de residencies de creación basaes nel intercambiu entre CCAA qu’implementamos na 1ª edición (2019), na qu’identificamos de manera bultable que nun esiste una conocencia en fondura nin una relación estable y duradera de sinerxies ente les compañíes y axentes profesionales del sector de les artes escéniques qu’operen nos 4 territorios originalmente implicaos nesti proyectu: Galicia, Asturies, Cantabria y Euskadi.

L’oxetivu principal de Camín Escena Norte ye’l de crear un nuevu corredor cultural articuláu per aciu d’esti nuevu territoriu compartíu, que sirva tamién pa la conocencia mutua por mediu de la producción cultural de cada Comunidá nel campu de les artes escéniques.

Asina, amás de poner en contactu al públicu con espectáculos y actividaes paraleles a les que d’otra manera nun aportaríen, Camín Escena Norte quier d’igual manera enanchar el marcu de la so propia programación, faciendo posible la interrellación ente territorios y les sinerxies profesionales ente compañíes de Galicia, Asturies, Cantabria, Euskadi y Navarra.

Habitación Pelegrina PRO quier ser un espaciu de convivencia profesional onde’l más d’un centenar de compañíes que tán nes asociaciones promotores (Escena Galega, EscenAsturias, Acepae, Eskena y Esna), más toes aquelles del sector que quieran xunise a l’actividá, puedan entrar en contactu, conocer les sos llínees de trabayu y propuestes estétiques, conocer la realidá de los distintos circuitos de programación, esplorar víes de coproducción y trabayu conxuntu y aportar a propuestes de formación que sían d’interés pal so desenvolvimientu profesional.

SIENDES. Rede de collaboración con proyectos llocales.

En 2023 punximos en marcha una nueva iniciativa llamada Siendes, consistente na collaboración de Camín Escena Norte con un proyectu cultural de cada Comunidá, coles mires de crear sinerxies, al empar que damos fuercia y contestu al nuesu proyectu llocalmente y proxectamos fora de la Comunidá los proyectos llocales. Proyectos toos que coinciden territorialmente y en feches averaes con nós, claro.

La idea surde de la programación d’una de les funciones del Ciclu Constelaciones 2022 en collaboración col FIOT (Festival Internacional de Outono de Teatru) de Carballo (Galicia), que nos abrió la puerta a pensar qu’esta fórmula de programación conxunta podría ser una idea a treslladar a otros proyectos coincidentes en feches y territoriu. Anguaño estes Siendes van abrise con una collaboración con 5 iniciatives culturales estremaes de Galicia, Asturies, Cantabria, Euskadi y Navarra, anque non en toes elles vamos llevar a cabu inda una estratexa de programación conxunta.

Los 5 proyectos qu’abren estes “siendes” en 2024:

CATÁLOGU D’ESPECTÁCULOS ENCAMENTAOS

En 2024, 6ª edición del proyectu, facemos per segunda vegada esti Catálogu d’Espectáculos Encamentaos Camín Escena Norte, una publicación qu’esperamos sía de tanta utilidá como interés pal sector, y que suponga un sellu de calidá pa los espectáculos equí recoyíos, que representen una esbilla amplia y diversa de daqué de la meyor producción escénica de Galicia, Asturies, Cantabria, Euskadi y Navarra.

Los espectáculos que conformen esta publicación fueron escoyíos por 5 comisiones independientes d’axentes profesionales del sector, una en caúna d’estes Comunidaes, ayenes a la organización de Camín Escena Norte y que trabayaron sobro les casi 200 propuestes presentaes a esta edición del proyectu pa xirar nel nuesu Itinerariu Constelaciones, la rede d’exhibición escénica profesional basada nel intercambiu ente los 5 territorios que conformen esti territoriu cultural común creáu allá per 2019.

Puede consultase más información equí:  CATÁLOGU