La balada del norte
Principáu d’Asturies | Saltantes Teatro
‘La balada del norte’ recrea con pulsu firme unos tiempos convulsos de grandes desigualdaes cola xestación de la Revolución d‘Asturies de 1934 como telón de fondu.
Tristán Valdivia, periodista ensin periódicu, editor ensin ésitu y amante ensin ilusión, abandona la capital en 1933 pa volver al norte. Ellí espéralu’l so padre, el marqués de Montecorvo.
Del negror de los valles mineros d’Asturies surden personaxes lluminosos y sol ruiu atronador de les mines de carbón escúchase’l xuxuriu d’un cantar antiguu.
Los vieyos y nuevos tiempos topeten brutalmente poniendo a prueba al protagonista y a la humanidá entera. Esti ye’l soníu de ‘La balada del norte’.
En 2013, Luis Alija y Nerea Vázquez crean Saltantes Teatro.
Nos sos más de 10 años de percorríu, llevaron a los escenarios una ventena de producciones con variedá d’estilos y temátiques: teatru familiar y mozo, cuentacuentos, musical, terror psicolóxicu, históricu, freak, bélicu… Amás de distintos tipos d’actividaes y proyectos dientro del ámbitu cultural y teatral.
Les sos últimes producciones: ‘Misery’ (Premiu Oh! 2023 a Meyor Producción), ‘El gorrumbu’ (Premiu Nel Amaro 2023), ‘El chigre menguante’ (Premiu Oh! 2024 a Meyor Escenografía y Meyor Autoría), ‘La parábola del carbón’ y, en 2025, ‘La folclórica’, conciertu-espectáculu cola voz de Nerea Vázquez y música en directu de Carla Armas, y ‘La balada del norte’, adaptación teatral de la novela gráfica homónima d’Alfonso Zapico.
