Lluna quier cuntánoslo too. Quier que sepamos cómo algamó los sos suaños, cómo aportó a la muyer que ye anguaño. Lluna nació con un déficit severu d’audición, lo que-y punxo les coses un poconín más difíciles qu’al restu, ¿o seique non? Lluna quier baillar, pero… ¿puede una neña sorda baillar? Ella failo. Bailla les coses que-y gusten y bailla les coses que nun-y gusten.
‘Luna’ ye un espectáculo enllenu de lluz, de movimientu, de pallabres, de signos, d’oxetos, de “capacidaes distintes”, d’intelixencies múltiples”. Porque non siempres ser distintu ye una desventaxa.

Luz de Gas Teatro

Luz de Gas Teatro ye una compañía de teatru profesional formada por Mayra Fernández en 2020, tres una trayectoria profesional y empresarial nel campu de les artes escéniques de más de 20 años.
Luz de Gas Teatro ñaz col enfotu de poner n’escena testos de creación propia de toa triba y empobinaos a públicu tantu adultu como infantil y mozo. Un de los principales oxetivos de la compañía ye aunir cultura y educación, siendo la implicación social y el trabayu rellacionáu con temátiques sobro la muyer, una de les premises coles que trabaya na creación d’espectáculos.