Dreaming Juliet en Xixón (Asturies)

DREAMING JULIET inspírase en “Romeo y Julieta” de William Shakespeare pa tratar l’asuntu más esencial de la esistencia humana: L’Amor. Con un llinguaxe visual asitiáu nel teatru de movimientu, na música interpretada en directu y na danza, DREAMING JULIET crea una poética universal de la pasión. 

Na pieza orixinal, los protagonistes viven un amor prohibíu ya idealizáu, condergáu poles families de dambos. La so intensa relación tien una duración curtia y un final aciagu. Agora imaxinemos que Romeo y Julieta nun morrieren y que la principal torga na so relación nun fora la oposición de les sos families sinón les adversidaes de les rutines del mundu contemporaneu.

DREAMING JULIET acompaña la relación de Romeo y Julieta dende’l momentu nel que se conocen hasta la vieyera, retratando con ironía y humor el día ente día de la pareya, el partu, la maternidá, la paternidá, el trabayu y la familia.

Elefante Elegante, la compañía

Elefante Elegante crea espectáculos de teatru visual basaos nel xestu y nel movimientu. Les sos creaciones busquen la universalidá, surdiendo de la fusión del teatru físicu cola danza y les artes plástiques. La compañía foi fundada por María Torres y Gonçalo Guerreiro nel añu 2000 coles mires de dar una forma artística a les sos moliciones sociales y esistenciales. La compañía tuvo los primeros años en Bélxica hasta instalase en Galicia nel 2006.

Elefante Elegante entamó como un proyectu esperimental en que participaben actrices y actores d’estremaos países europeos. N’escena, cada intérprete falaba la so propia llingua y l’interpretación basábase nel xuegu corporal y na relación col espaciu. Estos años d’esperimentación fueron perimportantes p’afitar les bases del so trabayu actual. Los sos espectáculos fueron reconocíos en delles ocasiones dende l’añu 2013 col Premiu María Casares al Meyor Espectáculu.